U casu Sade

Donatien Alphonse François, Conti di Sade... Eccu un tippu chì mireta a noscia attinzioni. Una quistioni a ci punimu dipoi sempri : chì saria statu u « Marchesu » s’iddu era esistutu à i ghjorni d’oghji ? Un tarcanu di a literatura postmuderna o un criminali sessuali mintuvatu da tutti i media ? Unu spezia di Dennis Cooper cù una piuma sporca è senza limiti, o unu spaversu imbastigliatu à vita ? Un pruvucatori drizzatu contr’à a filusuffia sticchita di u puliticamenti currettu o un serial killer raffinatu capaci di fà scimiscia a pulizza intarnaziunali ? Un baronu di u sinemà pornò o una simplicia canaglia chì a si sciala da un club di scambiu à quidd’altru ?

Ma via, inutuli di circà ciò ch’iddu saria, chì l’epica ùn hè più nè à i dandì incamisgiati nè à a lussura suffisticata. Ùn ci hè chè à veda di chì manera sò ridiculi i filusuffuchji d’oghji chì a si ghjocani. Un BHL pò spona quant’iddu voli i so ciuffi è u so vardarobba mentri l’emissioni televisivi, ùn hà nienti di cridibuli. Un Enthoven pò spirità quant’iddu voli a stampa people è fà casu di tutti i cunquisti pussibuli, ferma puri lisciu lisciu è ùn ci hè nienti à fà. Allora quali ? Quali si pudaria dì in parti l’eredu veru di Donatien ? Gore Vidal ? Parchì à a scrittura di l’intarissanti Caligula di 1979, cù Tinto Brass à a manuvra ? Saria un pratindenti, l’amicu Gore, senza cuntà ch’iddu fù u prima scrittori omosessuali sfacciatu è affirmatu di a literatura americana. Ma Vidal hà forsa avutu u tortu d’invichjà troppu, è di pruponaci i ripresi dissapiti di i so peplum… Allora quali ? U Pasolini di quiddi tempi ? Quissu chì rivindicaia una parintia cù u maestru libertinu quand’iddu rializaia u so Salò è i 120 ghjurnati di Sudoma ? È puri, mancu Pasolini ùn pò pratenda… Chì sì a Ripublica di Salò è u fascismu erani visti com’è un infernu in a so opara, ci pari bè chì Sade era menu sicondu gradu cù a so discrizzioni di i baccanali di Silling.

Allora quali ? Iè, quali ? Michel Houellebecq ? Philippe Sollers ? Iggy Pop ? A risposta ùn ci veni, o pari da veru evidenti : nimu. A sucità muderna impidisci simpliciamenti à un Sade novu d’esista, impidisci di dà un veru creditu à scrittori o artisti chì, par essa libarati ch’iddi sò, par essa invintivi in a sprissioni a più sciolta, fermani tutti più o menu liati da so imaghjina, da un cuntrattu, o da un’ industria di u libru o di u filmu chì l’addibbulisci in calchidocu. Fermani, tutti, prighjuneri di u marcatu. Chì hà tumbu à Sade, iè, a pratindimu, hè u capitalismu.

Chì ùn ci voli mancu à sbagliassi : Sade era Sade ghjà beddu nanzi di cumetta i so scritti. I purcarii ch’iddu cuntaia, i pruvucazioni ch’iddu mittia in sesta, erani stati spirtizati è vissuti nanzi chì ‘ssu veru Conti Pazzu amurali si sighi missu à scrivali. Era scandalosu nanzi d’essa unu scrittori udiatu è timutu da u puteri. Ghjà in 1768, avia sidutu una vidiva povara, prufittatu di a so distrezza pà lialla, pistalla è furzalla… In 1772, avia avvilanatu dui ghjuvanetti cù liccaturi unti cù a cantarida, un toscu presu annant’à un bufonu, è chì t’avia a duppia riputazioni d’essa un afrodisiaccu è di vincia i risistenzi mintali (unu spezia di GHB nanzi à l’ora)… In 1774, era statu parsiguitatu in Liò da i parenti di i so ghjovani servi, chì l’accusaiani di siduzzioni è d’abbusi… In 1777, fù u babbu d’un’ altra serva, cugnumata « Justine » da Sade, chì vensi è chì li tirò adossu pà vindicà a so fiddola… I scritti, a sapemu, ùn vinarani chè à parta da u 1785, in u mentri di i primi dodici annati di prighjò di a so vita. Dodici annati pà gattiva vita è ghjuvannari diversi, è chì farani di Sade, à tempu à a bestia furiosa capaci di minà i so coditinuti, u scrivanu impinsevuli ch’iddu duvintò. In guerra contr’à l’ordini, a rilighjoni è a murali. È in una riazzioni strema ch’iddu si pudaria qualificà d’impegnu, di sacerdoziu.

U rividimu, à Sade, l’imaginemu, uni pochi di ghjorna prima di l’assaltu di a Bastiglia, briunà da a so lucarna chì i ditinuti erani assassinati da i vardiani. D’una certa manera, ‘ssu criatori tontu, straziatu, bistiali, libaru sin’à a frenesia, briunaia par annuncià ch’un mondu novu avia da vena, briunaia in a so scimizia par chjamanni à ciò ch’iddu avia cuntribuitu à fà nascia : una Rivuluzioni. Chì i so ludatori burghesi d’oghji, i stessi ‘sendu quantu volti i maestri di virtù chì attuffani l’arti è a literatura, ci pinsessini à l’ora d’incamurrà a criazioni. A rivuluzioni nasci sempri in a margina di u libru, sempri in l’al dilà di l’imaginariu tullaratu.

Vela versu Bisanza

Hè à Cormac McCarthy chì no duvemu d’essa parvinutu à u puema di William Butler Yeats, Sailing to Byzantium, è d’avellu traduttu in corsu. È à u fattu chì u gran rumanzieru americanu avia intitulatu un di i so libra No Country for Old Men (resu, in tutti i sensi, da l’editori francesi cù l’orrendu è effiminatu Non, ce pays n’est pas fait pour le vieil homme…). Infini, beddu dopu ad avè lettu à McCarthy, ci ciuttaiamu in a puisia di Yeats quandi u primu versu di Sailing to Byzantium ci intarpillò :

That’s no country for old men.

C’hè quì, di sicuru, una fulguranza di i più forti, ma hè prima l’utilizazioni di ‘ssu versu liricu in l’opara sanguinosa è salvatica di McCarthy chì ci pichjò in u cori. McCarthy, arrubbendu à l’onirismu di Yeats pà intitulà u so rumanzu annant’à a fruntiera cruda trà u Messicu è i Stati Uniti, faci svià u puema è si servi di u primu versu com’è d’un’ antifrasa assuluta. Eccu una dimarchja chì ci piaci è chì no capimu di stintu. È senza u didattismu balordu di a spavintosa traduzzioni Non, ce pays etc.

Ciò chì no capimu di stintu, subratuttu, hè chì l’intinzioni di McCarthy, sciddindu ‘ssu versu par titulu, hè di parlacci d’un mondu disastrosu, fattu d’addisperu è di lacrimi, è di lacrimi di sangu svacati à nomu di u prufittu è di a vilania di l’essari. Cù, par tela di fundu, i traffichi liati à u marcatu di a droga è à a disispirazioni d’un Meziornu abbandunatu à i peghju abuminazioni mercantili. Un Meziornu ch’ùn poschi à a fini chè sunnià à l’esilia, è à l’ascinsioni suciali dirisorii è imprubabili, parasitendu u corpu tichju è currottu d’un Nordu sviluppatu ma debbuli, parchì addurmintatu da a so divizia.

Quì – in ‘ssa dillusioni faccia à i distini cullittivi – hè dinò a Bisanza di Yeats, tarra di sonniu è d’evasioni, par fughja da un mondu chì hà sminticatu i « munimenta di u spiritu eternu ». È quì hè l’evucazioni ironica è ghjacciata, ind’è McCarthy, d’un altrò illusoriu, è di tutti i fughjeri impussibuli. Ramintemuci chì l’eroi di No Country crepa d’avè trovu una balisgia carca à solda, è ch’iddu si faci sdunzà da i trafficanti chì li sò impressu è ch’iddu credi di burulà. Quì hè dinò par no u ligamu cù a Corsica, tarra suttimissa à l’appittiti feroci di i spiculatori d’ugni sterpa è di i maffiosi, è tarra mucata o tantu da a puvartà chè da u liberalismu freneticu d’unu sviluppu senza maistria. Tarra chì lodi oghji a forza è si cumpiaci in l’incultura, tarra abbisantata – a parola pari di circustanza – da u prufittu, è anch’idda « prighjuneri da ‘ssa musica sinsuali » chì pari di dannà u narratori di Yeats. Da quì, forsa, u nosciu disideriu – u nosciu bisognu – di dà i sunurità di u corsu à i versi di u pueta irlandesu.

È in cori à no ‘ssu ribombu tragicu : ‘ssu mondu chì s’alza (sta Corsica), pragmaticu è viulenti, chì ùn pussedi di durabili chè i liti ch’iddu suminighja, ‘ssu mondu chì imponi i so valori novi, cunsumeristi è disumanizati, annant’à i ruvini di l’illusioni vechji, ùn hè un mondu di a mimoria è di u rispettu di i valori elementarii di l’omu. Ùn hè più u locu di u « spiritu eternu », è ùn hè più l’agrunditoghju di l’omini di saviezza o di paci. Quiddi « vichjareddi » chì apriani a catena di a trasmissioni civilizata, è chì no aviamu crettu i ditintori d’un sapè murali è immurtali.

O savii ritti in u sacru focu di Diu,

Com’è in l’oru di a musaica d’un muru,

Lacheti u focu sacru, vudditi in a spirali,

È sighiti i maestri à cantà di u me estru…

Un’ altra America era pussibuli

Quandi a Francia vindisti a Louisiana à i ghjovani Stati Uniti, in 1803, i novi cuntrati acquistati firmaiani scunnisciuti. Ad avelli avvinti erani i soli trappori o cummircianti francesi, pochi numarosi, è i borghi scarsi chì crisciani longu à i fiumi faciani piuttostu uffiziu d’avanposti misareddi di u cummerciu chè di fanali altieri di a civilizazioni. Cussì n’era pà a cità di Saint-Louis, porta industriosa di u Punenti salvaticu, bastionu criolu persu annant’à u Mississippì, è ultima cumarca urganizata nanzi di pinitrà in i tarri priculosi è immensi di u paesu indianu. A fruntiera di a nova America era quì, è al dilà di u fiumu, nimu avia avutu a temerità di sfidà i pianuri senza limiti cavalcati da i tirrificanti guerrieri Sioux, Pawnee, Osage o Mandan.

Fù u prisidenti Thomas Jefferson à pinsà à una spidizioni di splurazioni di ‘ssi tarritorii, è à ottena da u cungressu i 2500 dollari nicissarii à a so missa in opara. A rispunsabilità di a missioni fù attribuita à dui omini, dui ufficiali chì t’aviani ghjà a spirienza di i guerri contr’à l’Indiani Algonchini, è chì duviani cunducia una piccula truppa di 45 militara longu à u fiumu Missourì, sin’à truvà un passaghju à l’internu di i tarri pà ghjunghja à a costa di l’Uceanu Pacificu. Si chjamaiani Meriwether Lewis è William Clark, è ben chè suldati, intristini in a Storia com’è i ridattori d’un ghjurnali di viaghju chì hè oghji cunsidaratu com’è un libru fundatori di a literatura americana. Infatti Jefferson, chì paria di nutriscia un veru intaressu scentificu pà l’uparazioni, avia impostu chì una inchiesta antrupulogica di i più sedii, ch’una cartugraffia rigurosa, è ch’un riscenzu generali di i pianti è di l’animali fussini intrapresi da i spluratori. Cussì setti raporti diffarenti funi scritti, tantu da l’ufficiali chè da l’omini di truppa. U raportu di u simpliciu suldatu Robert Frazer hè u solu à essa statu persu, ma l’altri detini a basa d’un libronu chì duvia cunnoscia pà a seguita i dicini di publicazioni è di mudificazioni.

U fattu stà chì a spidizioni di Lewis è Clark ci hè cuntata in ‘ssu libru com’è una fola sempri impinsevuli quandu si cunnosci a Storia di i diffarenti cunquisti, è dinò a seguita di i raporti trà l’Indiani è l’Americani. Impinsevuli parchì, mentri i dui anni di a spidizioni (da 1804 à 1806), ùn ci fù chè un mortu da u cantu di l’Americani, di malatia, è solu dui da a parti di l’Indiani, tumbi mentri una prova d’arrubeghju d’armi. Quandu si pensa chì u corpu d’armata scuntrò più di cinquanta tribù, trà qualissi certi da veru malfidenti o agrissivi com’è i Sioux o i Blackfeet, hè un bilanciu chì faria guasgi sunnià. In fatti u viaghju hè piuttostu u racontu pirmanenti di l’accolta calurosa è amichevuli di l’Indiani, è à tempu u duvutu di a spidizioni à ‘ssi populi, senza qualissi l’Americani si sariani persi o sariani pò dassi morti di fami. L’integrazioni à a truppa di a traduttrici shoshone Sacagawea fù d’altrondi una di i causi maiori di a so riescita.

Ma sì u ghjurnali di a spidizioni di Lewis è Clark hè da leghja com’è un rumanzu d’avvinturi, o com’è un testu antrupulogicu di i più rari, vali dinò pà i so aspetti più puetichi, veda ancu rumantichi. A discrizzioni di i loca, di i cacci, di i peschi d’ugni ghjornu, di l’animali scuntrati, ni faci un libru naturalistu passiunanti. A scuparta par esempiu di i surghjenti di u fiumu Missourì hè cuntata com’è un mumentu di fascinu assulutu pà i spluratori. A prima scontra cù i grizzlì, inveci, ferma par iddi una stunda di tarrori. È pà u littori mudernu, st’epupea scritta ghjornu pà ghjornu ùn hà persu nudda di u so valori, di a so capacità a facci sempri sunnià.

Più tragica, a sapemu, fù a cunquista chì risultò da ‘ssi primi cuntatti. Ma a cesta di Lewis è Clark avaria pussutu annuncià un altru raportu trà indigenii è novi vinuti. Avaria pussutu renda pussibuli un’ altra America, luntana da i frastorni imperialisti è i genucidii crudeli. Un’ America induva a prima matinata di u mondu ùn saria micca stata svirghjinata da a scimizia è l’ingurdizia di l’omini. Da u bisognu perpetuali di duminazioni. Ma quandu vi diciamu ch’iddu s’agia quì d’un libru pà sunnià…