È una turta pà BHL, una !

Ùn la so par vo, ma à mè, i cacciati di l’uni è di l’altri annant’à a Corsica, ùn mi facini mancu più nudda. In i tempi, infribbaiu di rabbia, o ridiu, avali fermu senza affettu. Hè cussì. A forza di l’abitudina, pensu. U fatalismu faccia à a stupidità assuluta di ditti sapienti chì trovani intarissanti di stuppà quì un vilenu, o i generalità zottichi, ch’iddi sariani i primi à truncà in altrù à nomu di u razzismu, di a discriminazioni o di l’intullarenza…

Ma comu ? Aghju dittu bè fatalismu ? Stancaghjina di l’abitudina ? Invechju merè, ed eccu ch’ùn so più quiddu ! Ci voli ch’e riagischi è ch’e ritrovi i stradi salutarii di l’indignazioni chì faciani a me riputazioni di scrittori in rivolta ! O allora hè meddu ch’e pieghi tuttu è ch’e rumpa a piuma ! Ma, è rassicurighju ancu quì i me ditrattori, ùn ci semu ancu. Piccatu.

Bernard-Henri Lévi, dunca. Stu fanali di u pinsà ripublicanu, chì si feci un ghjornu u prumutori d’un filusoffu, Jean-Baptiste Botul, ch’ùn esistia mancu, veni di truvà a suluzioni pà luttà contr’à a viulenza maffiosa in Corsica : dumanda à i turisti di metta in piazza un boycott di l’isula, è, pichjendu cussì à u cori di l’ecunumia isulana, di puniscia una pupulazioni intera pà i malfatti di certi vituparati ch’iddu ricunnosci iddu stessu com’è ‘sendu una minurità.

À senta ad iddu, merè, ci hè tandu una lizzioni alta di filusuffia à ritena, è chì ci insegna chì pà luttà contr’à un’ upprissioni, ci voli à dannà u populu chì ni pati. Suvitendu ‘ssa logica sinnata, ci vulia piuttostu, dopu chì Kadhafi avissi prumissu di sdunzà i ribeddi libiani sin’à l’ultimu, chì l’OTAN è l’avviazioni di Sarkozy bumbardessini à Benghazi, è ch’iddi sfassessini da a carta a risistenza di Misratà. Da chì dunca avè dumandatu u cuntrariu ? Ghje’ socu in piena cunfusioni, a ricunnoscu. Sì i populi sò culpevuli di i boia chì i strangulighjani, sì a punizioni cullittiva i devi pichjà pà i malfatti d’una minurità d’assassini, parchì ùn aiutà micca dinò à Bachar el-Assad à fà curra u sangu di i nocenti di Banias o Deraà ?

Ma voltu à l’affar’ di u boycott turisticu. À mè, à dilla franca, m’imbistiaria pocu è micca, ‘ssa suluzioni tuntina di BHL. Socu funziunariu è i strascinadori di ciabatti – quant’è i bobò in circa di soli – ùn m’agradiscini tantu. Ma u fattu stà chì l’aienti onesti chì travaddani cù u turismu in Corsica, è senza nisciuna brama di fammi u so difinsori à usu Poujade, ni cunnoscu quantunca uni pochi. A cridarà o nò Bernard-Henri, ma a maiurità di ‘ssi travaddadori ch’iddu voli fà cripà di fami ùn ani mai tumbu à nimu. Inveci, sì dumani fussini famiti, sì dumani si ritruvessini senza travaddu, ùn la so s’iddi ùn la fariani micca d’andà à abbuttà, à furà, è ancu à tumbà, in una logica di viulenza chì u suttisviluppu hà sempri suminatu.

À suppona ancu chì a cura pricurata da BHL pudissi riceva calchì creditu, è chì un arruvinu ecunomicu di a Corsica ci caschessi à dossu com’è ghjustu casticu, l’avaria da frasturnà da veru, à quissi chì ani sceltu par mistieri – ed esistini – d’essa criminali ? Capaci d’invistiscia in cuntinenti, o à u stranieri, truvariani piuttostu ancu più faciuli a mani d’opara pà i so traffichi, è ancu ringraziariani à Bernard-Henri pà i so analisi cussì fini.

Ma arrestu di filusuffà in darru, è di fà neci chì certi parolli balordi sighini impurtanti. Arrestu è inveci di lampalli i ghjastimi, u ringraziu anch’eu, à BHL. Parchì dipoi quiddu buzaiu d’Onfrey, era da monda ch’ùn aviu inturtatu à nimu. Dunca quissa, a turta, a cacciu vulinteri. Guasgi cù premeditazioni. Splaaacciu ! tandu…